،، كتب ،،ناصر عبد الواحد. في وقت بقت فيه الأخبار اللي بنسمعها كلها عن الغش والطمع، طلع شاب مصري محترم يثبت إن الخير لسه موجود
محمد الشافعي، طالب بكلية الآثار بجامعة القاهرة ومن أبناء شبين القناطر بالقليوبية، عادي وهو ماشى مع صاحبه ربنا حط قدامه اختبار كبير.
وهم ماشيين لقوا شنطة مرمية تحت كوبري، في مكان مفيهوش غير عربيات معدية. الفضول خلاهم يبصوا يشوفوا فيها إيه، وكانت المفاجأة… 850 ألف جنيه ومجموعة أوراق وروشتات طبية.
أي حد كان ممكن يفكر في نفسه أو يعتبرها “رزق ساقه ربنا”، لكن محمد فكر في صاحب الفلوس اللي أكيد قلبه بيتقطع عليها.
استنى يمكن حد يرجع يدور عليها، ولما محدش ظهر بدأ يدور بنفسه على أصحاب الشنطة من خلال البيانات الموجودة في الأوراق، لحد ما وصل ليهم.
واتأكدإنهم أصحابها الحقيقيين، وبعدها سلمهم الشنطة كاملة زي ما هي، ولا جنيه ناقص.
المفاجأة الأكبر كانت لما عرف إن أغلب المبلغ ده كان مخصص لعملية جراحية مهمة، وإن ضياعه كان ممكن يقلب حياة ناس بالكامل.
أصحاب الشنطة حاولوا يكافئوه بمبلغ 85 ألف جنيه، لكنه رفض بكل احترام، واكتفى بجملة واحدة خلصت معنى الامانه كله ،،قل متاع الدنيا قليل ،،،